Noong June 6, 1998, ayon sa aking reliable source, inilipat ng GMA management ang Startalk, isang weekly entertainment at talk show, sa mas maagang Saturday afternoon timeslot. Inilagay ito kaagad pagkatapos ng Eat Bulaga!, isang noontime variety show. Ang dahilan? Para maunahan nito ang karibal na show na Showbiz Lingo (ABS-CBN). Bago ang pagbabagong ito, tuwing Sunday napapanood ang Startalk.
Sa paglipas ng panahon, nagkaroon ng tinatawag na “seamless patch” sa pagitan ng Eat Bulaga! at Startalk. Ang “seamless patch” ay isang TV-production term kung saan direktang nagta-transition ang isang palabas na malapit nang matapos papunta sa susunod na show, nang walang commercial break o anumang patlang sa broadcast. Ginagawa ito para hindi man lang maisip ng mga manonood na lumipat ng channel.
Ginagawa rin ang ganitong seamless patch sa ibang bansa. Iba-iba ang tawag nila rito, gaya ng “seamless transition,” “clean feed,” “cold open,” “CM-nuki,” “live hand-off,” at “studio-to-studio switch.”
Pero siyempre, hindi rin tayo nagpahuli sa paglalagay ng sarili nating Pinoy touch sa trend na ito. Sa pagtatapos ng bawat Saturday edition ng Eat Bulaga!, lumalabas sa split screen ang mga host nito kasama ang mga host ng Startalk. Pagkatapos, sisigaw ang late Master Rapper at Eat Bulaga! TV host na si Francis Magalona ng linyang, “Luzon, Visayas, Mindanao… SEAMLESS NA!” bilang hudyat na magsisimula na ang Startalk.
Dahil maraming nanonood ng parehong Eat Bulaga! at Startalk, madalas marinig ng mga Pilipino ang linyang ito, kaya tumatak ito sa kanilang isipan. Dahil dito, naging bahagi ng Pinoy pop culture ang “SEAMLESS NA!” dahil sa collective cultural memory at malawak na pagkilala rito ng publiko.
Batay sa aking masusing (at napakaseryosong 😄) research, nagsimula nilang pasikatin ang linyang ito around 2003. Nang pumanaw si Francis Magalona noong March 6, 2009, ipinagpatuloy pa rin ng mga host ng dalawang programa ang nakagawiang ito. Pero pagsapit ng around September 2010, tuluyan na rin nila itong itinigil.
Leave a Reply